Historia e Fakultetit te Artit Skenik

Historia e Fakultetit të Artit Skenik në Akademinë e Arteve



Fakulteti i Artit Skenik është pasardhës i Shkollës së Lartë të Aktorëve “ Aleksandër Moisiu ” themeluar më 1956 pranë Teatrit Kombëtar.

Me themelimin e Institutit të Lartë të Arteve më 1966 u perfshi si Departament i Dramës me synim specifik përgatitjen e aktorëve të ardhshëm.
Në shtator të vitit 1982, krijimi i departamentit të regjizurës ishte domosdoshmëri e kohës për shkak të intensifikimit të jetës teatrore në Shqipëri.

Rritja e numrit të studenteve dhe trupës mësimdhënëse si dhe afirmimi në jetën artistike shqiptare i kuadrove të përgatitur nga kjo shkollë solli krijimin e një fakulteti të pavarur në vitin 1990, Fakultetin e Artit Skenik.

Studimet zgjasin 4 vjet . Metodat e mësimdhënies bazohen në sistemin e Stanislavsky. Në vitet e fundit studentët angazhohen në punë krijuese, një metodologji kjo e bazuar në konceptet bashkohore të artit teatror.

Brezi i ri i aktorëve të përgatitur në këtë institucion përbëjnë një forcë gjeneruese në teatër, film dhe television. Trupa mësimdhënëse dhe bashkëpunëtorët e Fakultetit janë emra të mirënjohur në fushat ku operojnë – regjizorë, aktorë, skenografë dhe koreografë me njohuri të gjëra teorike dhe praktike. Shumica e tyre kanë marrë çmime artistike për kontribute të veçanta dhe punë krijuese.

Arritjet në Fakultetin e Artit Skenik janë mundësuar nga entuziazmi dhe angazhimi i madh i stafit dhe i studentëve tanë të talentuar.
Mbështetja e Fondacionit “SOROS” ka bërë të mundur sigurimin dhe zgjerimin e paisjeve teknike për përmirësimin e ambienteve mësimore dhe interpretative shumë të rëndësishme këto për procesin mësimor.

Fakulteti i Artit Skenik vlerëson rolin e marrëdhënieve ndërkombëtare me shkollat e tjera artistike në Ballkan, Europë e më gjerë. Këmbimi i eksperiencave, pjesëmarrja në aktivitete dhe workshop-e ndërkombëtare, kanë kontribuar në futjen dhe përdorimin e metodave të tjera të mësimdhënies në këtë fakultet.